Thlangtiang an tla, Corbett an tling

AIFF Futsal Club Championship 2024–25-ah Mizoram aiawh Thlangtiang FC-in champion lai Corbett FC hnehin bul ṭan ṭha mah se an che ṭha chhunzawm lo a, group stage an paltlang lo. Group B aṭangin Bhawanipore FC leh Corbett FC ten quarterfinal an lut.

Shri Manoj Sarkar Stadium, Rudrapur-ah Thlangtiangin August 11, Thawhṭanni zan khan group match hnuhnung berah Bhawanipore an hmachhawn. Bhwawanipore hi Mizo player ṭha David Laltlansanga, Lalsangkima, K. Roluahpuia, Vincent Laltluangzela leh Ephraim Vanlalduhsaka te awmna a ni a, India futsal team coach Joshuah Vaz enkawl a ni bawk.

Bhawanipore hian Thlangtiang hi 7-4 in an hneh a; Mizo club tana Lalremtluanga, Lalremruata, Jonathan Lalrawngbawla leh Joseph Lalkhawngaiha te goal a tawk zo lo. Thlangtiang hian point thum an hmu a, an goal difference -2 a ni. Mizo club-in quarterfinal an luh dawn a nih chuan Corbett FC-in Golazo FC an hneh a ngai a, chutihrualin goal sarih china an chak erawh chuan champion lai hi an tling thung dawn.

Corbett FC-in Golazo lakah team ṭha zawk an ni tih an lantir a, hun tawp lamah risk an la nasa goalkeeper Lalrinzuala chawpin an nawr vek. Golazo-in quarterfinal luh beiseina an neih loh hnuah tlarhnung an ti phui tawk lo a, Corbett goal bawh a nat avangin champion lai hi 14-7 in an chak. Corbett goal hnuhnung paruk hi hun tawp lam minute ngaa lut vek a ni a, quarterfinal lut tawh tura ngaih Thlangtiang tan hmuh a hrehawm ang.

Chutihrualin Thlangtiangin Golazo dem theihna an nei lo a, Mizo club hian Golazo hi hneh se match hnihna leka quarterfinal lut thei an ni a, an hneh tlat lo. Corbett tan Mizo tlangvalte an che ṭha a; Rony C. Lalenkima'n goal li khungin, PC Lalremruata leh C. Lalremrauta ten goal hnih ve ve an khung a, Lalrinzuala leh Lalmuansanga ten goal khat ve ve an khung. Goal 14 zinga goal 10 hi Mizo tlangvalte khung a ni.