Cindy telna India U20-in Asian Cup khel dawn

Mizo hmeichhe footballer lar, Cindy Remruatpuii Colney khelhna India Under-20 hmeichhe team chu AFC Under-20 Women's Asian Cup 2026 khel turin an inpet tling a, All India Football Federation chuan an lawmzia lantir nan lawmman atan India U20-te hi cheng nuai 22 a hlan.

India U20-te hi group D-ah awmin, an elpui Indonesia (0-0), Turkmenistan (7-0) leh a thlengtu Myanmar (1-0) te lakah goal an chhuah miah lo a, tlawm nei loin Asian Cup khel tur hian an tling a ni.

Mizo coach lar Lalbiaksanga Colney fanu Cindy hian season hman zawh takah khan East Bengal hmeichhe team tan khelin, Kolkata club hi Indian Women's League-ah champion nomawi a chawipui tawh bawk - tun hnaia a record hi a duhawm hle.

AFC U-20 Women's Asian Cup hi April 1-18 chhung hian Thailand-ah khelh a ni dawn a, Asia khawmualpui aṭangin ram 12-in inelna an hmachhawn dawn - kum 2006 hnua he inelna hmachhawn tura India an tlin leh hmasak ber a ni hial.