Rinkai Sinner a chak

A khingpuiin set point hmu ve hman zuai mah se Jannik Sinner tan buaina tur a awm chuang lo, world number 1 hian Gabriel Diallo chu 6-2, 7-6(6) a hnehin Cincinnati Open khelh laiah last 16 a inhlangkai.

Center Court-a inkhelah, seeded pakhatna Sinner hian set khatna bikah chuan game hnih chiah a hloh. Mahse, set hnuhnung zawkah erawh Canadian tlangval Diallo a ṭang thei hle a, point khat hmuh belh zauh ni se la chuan set la thei dinhmunah pawh a ding hman hial.

Amaherawhchu, Sinner a ṭang kawh tlat, forehand ṭha tak hmanga point vaw chhuakin tie break an khel zui a, hun pawimawh laiah a service hum chho zuiin a chak tlang, a match lehpekah chuan Adrian Mannarino a hmachhawn leh ang.

Kum 23 mi Sinner chuan, "Gabriel Diallo-a service kha a ṭha thei em em mai a, a bik takin set hnihnaah khan a ṭha zual hle. Hetiang inkhelah hi chuan tihsual neih a pawi thui ṭhin a, inven fimkhur a ngai thei hle.

"Na tak taka ball vaw thei hmachhawn hi chuan hla deuh tak aṭanga ball chan thiam a pawimawh, chutiang tur chuan baseline bulah ka awm tam bawk. Grand Slam kan khelh leh dawn hnai tawh a, hetiang match hautak lo khelh hmasak hi ka tan a ṭha," tiin a sawi.

Sinner hian inkhel tir lamah a service a hloh nghal a, mahse a zawna game thum la zuiin a chungnung. Hard court-ah ball a kal chakin a sawt sang deuh a, grass nen ball kal dan a danglam em avangin Wimbledon champion tan insiamrem nghal a ngai.

Italian tlangval Sinner hian season kal laiah Australian Open leh Wimbledon nomawi a chawi tawh a, an hmabak chu US Open a ni dawn. New York khawpuia kal hmain tuna inelna neih lai hi a tan inbuatsaihna hnuhnung a ni ang.

Inkhel dangah Taylor Fritz chuan Lorenzo Sonego chu 7-6 (7/4), 7-5 in a hneh a, tun hnai a match hnuhnung 25 aṭangin vawi 21 ngawt hnehna a chang. Frances Tiafoe pawhin darkar khat leh minute 22 chhungin Ugo Humbert chu 6-4, 6-4 in a hneh.

American tlangval Tiafoe hian a match lehpekah chuan Holger Rune a hmachhawn ang - inkhel dangah Rune hian Alex Michelsen chu 7-6 (7/4), 6-3 in a lo hneh ve bawk a ni.