Harsa takin Sabalenka-i a chak

Aryna Sabalenka tan Cincinnati Open last 16 lut turin fiahna hautak tak mai paltlang a ngai - Thawhṭanni zan inkhelah Sabalenka hian Emma Raducanu chu 7-6 (7/3), 4-6, 7-6 (7/5) in a hneh.

Champion lai Sabalenka leh Raducanu te an inkhel tawk takzet a, darkar thum an inkhelh tlin hnuah world number 1 Sabalenka hi a vannei zawkah a ṭang. Ohio-a boruak a lum hle a, 32C te a nih bakah boruak a hnawng tel bawk, inkhel hautak bik a ni.

Belarus nula Sabalenka chuan, "Match hautak tak mai paltlang hi chu a hlu bik, chutihrualin hahchawlhna hun kan mamawh belh ṭhin. Hetiang match hi chu Grand Slam nen a danglamna a awm lo," a ti.

British star Raducanu khan set hnuhnung ber thlengin a bei thei hle, vawi 13 tehmeuh an deuce a, a khingpuiin a service chhuhsak theihna remchang vawi li a hmuh pawh a inchhanhim thei vek - mahse tie break khelh hnuah erawh a vanduai ta zawk.

Iga Swiatek a chet fuh loh hnuah Sabalenka hian hlawhtlinna a chang hnem zual ta hle, Grand Slam dawta inelna Masters 1000 huangah hian a vawi 10 nan champion a beisei mek; season kal lai bika a pahnihna tur a ni ang.

Chak lo mah se Raducanu hian player ṭha leh sang zawkte hmachhawn dan a thiam viau tih a lang. Tun hma lama a lo champion tawhna US Open khel tur pawhin a phur dawn a, hlawhtlin leh ngei pawh a beisei ngam dawn a ni.

Inkhel dangah Australian Open champion Madison Keys chuan game li chauh hloh chungin Japanese nula Aoi Ito a hneh. Spanish player Jessica Bouzas Maneiro pawhin wirldcard hmanga inlan Taylor Townsend 6-4, 6-1 in a hneh, a match lehpekah chuan Sabalenka a hmachhawn ang.