Tottenham Hotspur-in Eze an duh

Europa League champion Tottenham Hotspur chuan Crystal Palace aṭangin forward Eberechi Eze lakluh an tum a, London club hian Eze lakluh a nih theih dawn leh dawn loh an buaipui ṭan mek.

Spurs hian an captain Son Heung-min chu Los Angeles FC lamah an kaltir a, attacking midfielder James Maddison chu khup hliam vangin season tluan deuhthaw a inkhel thei dawn lo bawk.

Hetiang a nih avang hian Spurs-in tlarhmaa khel tur player an mamawh a, Eze lam an hawi. Thomas Frank-a hnuaia khel tur team hian Manchester City winger Savinho pawh lakluh tumin an dawr a, tunah erawh Eze lam an hawi ta thung.

City chuan Savinho hi chelh an pawi ti lo nia sawi a ni a, a chhuak dawn a nih pawhin pound maktaduai 50 aia tlawma chhuahtir an tum lo - Spurs hian hei hi an zuam lo nge, Eze nen an pahnih hian lakluh an tum tho dawn, tih chu zawhna a ni a, engmah a la chiang lo.

Eze hi Arsenal pawhin an beisei a, mahse, inhralh ṭhen phawt an ngaih avangin an la ngaihven zui tak tak thei lo - Leandro Trossard, Reiss Nelson leh Fabio Vieira te chu chhuak tura ngaih an ni a, an chinfel hmain Spurs hian an lo lak khalh lo ang tih a sawi theih ta lo.

Kum 27 mi Eze hian kum 2020 khan Queens Park Rangers aṭangin Crystal Palace hi pound maktaduai 19.5 in a zawm a, match 168-ah goal 40 khungsakin, assist vawi 28 a nei bawk.

England international Eze hian kum 2023 khan ram tana a match hmasa ber a khel a, match 11 inlansak tawhin, goal khat a khung tawh a, Euro 2024-ah khan Three Lions squad-ah a tel.

Season hman zawh tak kha a tan season duhawm ber ang hiala chhal theih a ni a, inelna hrang hrangah match 43 khelin goal 14 a khung a, assist vawi 11 a nei - FA Cup final-a 1-0 a Manchester City an hneh ṭuma goal awmchhun khungtu a ni.

Palace hian season bul ṭanna inkhel, FA Community Shield-ah Liverpool hnehin nomawi an chawi leh tawh bawk a, an club chanchina hun hlimawm ber a nih rualin, a rah chhuah chu player langsarten club dang an zawm a nih hmel.

Eze bakah hian captain Marc Guehi pawh chhuak thei dinhmunah a ding mek a, kum khat chiah contract a neih tawh avangin club chairman Steve Parish chuan hralh mai chu an tan ṭha zawka a hriat thu a sawi - Eze hi chuan kum hnih a la nei.

Guehi hi January khan Newcastle United chuan £65mtd-in an lo dawr tawh a, mahse, Palace hian contract thar a ziah mai beiseina avangin an chhuah phal lo.

Mahse, Guehi-a'n contract thar a ziak duh lo a, Palace hian an chhuah phal lo a nih chuan a contract hman zawh a, mahni duh lam club pan mai a hnial lo niin an sawi.

Liverpool chuan Guehi hi lakluh tumin an dawr tawh a, Palace-in £40mtd-a an chhiarna chu an ngam lo thung - kum khat chauh contract a neih tawh avangin, tlawm taka an lei thei a nih loh chuan nghah law law an pawi ti lo.

Hetihlai hian Palace chairman Parish chuan, "Ani ang player a thlawna kan chhuahtir chuan kan tan buaina a ni ang," a ti a, tun nipuiah hralh hman ngei a tum.