US-ah La Liga khel dawn

Royal Spanish Football Federation (RFEF) chuan USA-a Villarreal leh Barcelona ten league match khat khelh an dilna chu an pawmsak a, FIFA leh UEFA-in a pawmsak ve leh phawt a ngai thung.

Villarreal leh Barcelona te inkhel tur hi fixture ang chuan December 21-ah, Villarreal khelmual Estadio de la Ceramica-ah khelh tur a ni a, mahse, club pahnih hian US-ah an match hi khelh an dil angin pawmsak an ni.

Ruahman dan chuan club pahnih hi Hard Rock Stadium, Miami-ah an inkhel dawn - he stadium hi World Cup 2026-a match sarih khelhna tur hmun a ni a, club pahnih bakah La Liga lam hian sum tam zawk hmuh an inbeisei niin a lang.

Hetihlai hian Spanish football supporters' association, FASFE chuan Barcelona leh Villarreal fan group ten, US-a inkhelh an dodal chu an zawm a, ruahman anga match hi US-ah khelh a nih chuan, dan anga hma an lak tur thu an sawi.

Italian Super Cup leh Spanish Super Cup te chu ram pawnah khelh ṭhin a lo ni tawh a, Serie A club AC Milan pawhin Como nen February, 2026-ah Serie A match chu Perth, Australia-ah khelh an tum.

AC Milan-in ram pawna inkhelh an tum chhan langsar erawh an stadium San Siro-in Winter Olympics opening ceremony a thlen dawn vang a ni a, hetihlai hian FIFA, UEFA, Football Australia leh Asian Football Confederation (AFC) phalna an la nei lo thung.