Zabarnyi-a man a tam

Paris Saint Germain chuan Bournemouth defender Illia Zabarnyi an la lut ngei dawn tih a chiang ta, pound makatduai 57.1 man niin season nga chhung atan Paris club nen hian an inrem.

Ukraine international defender hi tlarhnung laia khel chi a ni a, kum 22 mi chauh la niin hmabak pawh a nei eng hle - Premier League club chhuahsanin Champions League nomawi chawi mektu a zawm a, a tan chona lian tak a ni ang.

Nipui bazar chhungin Bournemouth hian player an hralh to thei hle - Zabarnyi hma hian Dean Huijsen (£50mtd) chuan Real Madrid a zawm a, Liverpool chuan pound makatduai 40-in Milos Kerkez an la bawk.

Player pathum an hralhna man belhkhawm hi pound maktaduai 147 a tling hial a, sum chu an hmu tam hle. Mahse, Cherries hian an tlarhnung lam chu an thuam chak a ngai dawn hle thung a ni.

Bournemouth hian Zabarnyi thlaktu atan Bafode Diakite chu an be fel ve tawh bawk; Lille defender lei chhuak tur hian pound maktaduai 30 bawr an sen a ngai thung ang.