Leipzig-a kir duh Nkunku

Chelsea forward Christopher Nkunku chuan a club hlui RB Leipzig lama kir a hreh lo - hetihlai hian media ṭhenkhat chuan Champions League khel phak club zawm a duh niin an sawi.

England-a beisei phak lo striker hi Blues hian hralh an duh a, Germany, England leh Italy aṭangin rimtu a nei nia sawi a ni.

Kum 27 mi forward duhtu zingah Leipzig an tel a, hetihrual hian German club hian sum an seng huai ngam lo thung - season tharah European football an khel dawn lo a, player hlawh thlengin, sang tak insen an huam lo.

Nkunku hian Leipzig tan a khelh laiin match 172 a khel hman a, goal 70 khungin, assist vawi 56 a nei. June 2023 khan pound maktaduai 52-in Blues hi a zawm a, mahse, match 62-ah goal 18 chiah khungin, assist vawi nga a nei.

Chelsea hian an hralh dawn a nih chuan £43.2mtd tal hmuh an inbeisei nia sawi a ni a, Blues hian Leipzig midfielder Xavi Simons an duh avangin Nkunku pek tel chungchang pawh an sawi niin khawthlang media-te chuan an tarlang.