United-in player thar lalut dawn

Manchester United mana­ger Ole Gunnar Solskjaer chuan nimin tlai khan January transfer laiin player thar pahnih khat lakluh an tum thu a sawi. United hi January 26, Pathianni zan dar 8:30-ah Watford hnehtu Tranmere nen Prenton Park-ah an inkhel ang.

United hian Liverpool an hneh loh hnuah Old Trafford-ah Burnley lakah 2-0 in tlawm a, Norwegian manager dinhmun pawh a derthawng phah hle. Chutihrualin club hotute erawhin Solskjaer chungah rinna an la nghat a, eng chen nge an rin chhunzawm tih erawh sawi lawk theih a ni lo.

Solskjaer chuan, "Player pakhat emaw pahnih emaw dawr lai chu kan nei a, club thuneituten an lalut thei ang em tih erawh hunin a hril ang," tiin inthuam ṭhat a tum thu a zep lo. Amaherawhchu United lak tur erawh hriatthiam a har hle. Old Trafford zawm tura sawi hnaih ber Bruno Fernandes man chungchangah Sporting CP leh English club an indawr fuh theih loh avangin a tlawlh tih a awm. Red Devils hi an player hlui Carlos Tevez nen thlenga sawi zawm a ni a, January transfer tingaihnawmtute zinga mi an ni.

Tunhnaia an boruak ṭha lo sawiin Solskjaer chuan, "Pawi kan ti takzet, zep ka tum lo. Rilru huaisen a ṭul a, hun harsa hi kan paltlang ngei a ṭul a ni," tiin a sawi. United hmachhawn tur Tranmere hi League One-ah 21-naah an awm mek a, an dinhmun aṭanga thlir chuan Solskjaer-a hote tana harsa tur a awm lo. Amaherawhchu, Tranmere hian Ningani zan khan an mualah Watford 2-1 in an barakhaih a, United pawh an fimkhur a ṭul ang. Solskjaer chuan, "Tranmere khelmual a ṭha tawk lo a, kan pahnih tana a ṭhat dawn loh avangin sawiselna tur a awm lo. Tunlaiah khelmual a ṭhat tawh avangin player-te pawh an fimkhur tawk lo ṭhin a, tun ṭumah erawh an fimkhur a ṭul khawp ang," tiin Prenton Park pitch chungchang a sawi.