Newcastle defender thar Thiaw

Newcastle United chuan AC Milan aṭangin defender Malick Thiaw an la lut a, pound maktaduai 34.6 man niin a contract rei zawng erawh chiang taka tarlan a ni lo thung.

Kum 24 mi Thiaw hian Milan tan season thum chhung a khel a, tawnhriat a nei ṭha tawh. Magpies manager Eddie Howe-a'n nipui bazar chhunga player a lak thar pathumna a ni chiah bawk.

Germany international Thiaw hma hian Nottingham Forest aṭangin Anthony Elanga an lei a, goalkeeper Aaron Ramsdale chu Southampton aṭangin loan hmangin an hawh tawh bawk a ni.

AC Milan tana match 85 khelhsak hman Thiaw-a chuan, "Newcastle United hi chu sawifiah leh hranpa a ngai lem lo, club lian leh sulhnu nei ṭha a nihna chu mi hriat tawh sa a ni a, a fiah nghal em em a ni.

"Manager nen kan inbia a, a hmathlir min hrilh kha he hmun ka rilru a hmin nghal thlap," tiin a sawi a, a club thar tan chuan player satliah mai ni loin, rinrawl leh innghahna tlak nih a tum tih a sawi bawk.

Football bazara buai rilru tak, a player ṭhenkhat chhuah duh vanga luhai ve tur tak Howe chuan, "Malick hi player hlu tak a ni. Bundesliga leh Serie A tawnhriat nei tawh a ni a, kan team min ti chak thei tur a ni ang," tiin a sawi.