Real-in US-a La Liga khelh duh lo

Villarreal leh Barcelona ten USA-a an La Liga match khelh tur pakhat khelh an tum chu Real Madrid chuan na takin a dodal a, Spanish club chuan, "Club pahnih hi US-a an inkhelh phalsak an nih chuan football khawvel tan a pawi hle ang," an ti.

Barcelona hi December 21-ah Villarreal nen hian Yellow Submarine khelmual Estadio de la Ceramica-a inkhel tur an ni a, mahse, club pahnih hian USA-a Hard Rock Stadium, Miami-a he match hi khelh an dil.

Royal Spanish Football Federation (RFEF) chuan club pahnih dilna hi an lo pawmsak a, mahse, UEFA leh FIFA lamin an la pawm ve leh phawt a ngai - Real chuan hei hi duh loin, na takin an sawisel.

Real chuan, "Team zawng zawngin, inkaihhruaina inang hnuaiah an match an khel tur a ni," an ti a, ram pawna league match khelh phalsak chu infiamna rilru ai maha sumdawnna rilru a nih dawn avangin ṭha lo an tih thu an sawi - FIFA hnenah phalsak lo turin an ngen bawk!

Hetihlai hian Villarreal president Fernando Roig chuan, "Villarreal mai piah lamah, kan football hi tihlar deuh deuh a ngai. Club tam zawkin kan ruahmanna ang hi an club a ṭhan zel theih nan an duh ve tho a, hetianga hmalakna hian league a tilarin, Premier League anga league ropuite kan hnaih ve sawt thei dawn a ni," tiin a lo sawi ve thung.