Season kal laia match 50 chak tling Alcaraz

Carlos Alcaraz chuan nimin zing khan Hamad Medjedovic chu 6-4, 6-4 a hnehin Cincinnati Open khelh laiah last 16 a inhlangkai a, tennis season kal mekah match 50 a chak tling ta chiah bawk.

Spanish star Alcaraz hian mellung pawimawh a phun a ni satliah lo, ATP Masters 1000 huangah a zawnin match 13 a chak tling ta chiah bawk a, player ropui Novak Djokovic hniak hnung a zui chho mek bawk a ni.

Grand Slam vawi 24 champion Djokovic khan kum 2013-2016 inkar khan, season tin match 50 hnehna a chang tling ziah. Tun hnaiah Alcaraz hian a hnung a rawn zui a, season hnuhnung paliah match 50 hnehna a chang tling ta vek.

World number 2 Alcaraz chuan, "Medjedovic khan player ṭha tak, ball vuak na em em mai, service nei ṭha tak bawk si a ni tih ka hria. A ball rawn vuak lo dawnsawn a harsa thei hle, duhna laiah vuak let a harsa ṭhin khawp mai.

"Ball kal chak tak mai hmachhawn hi chu keimah chauh ni loin player dang pawhin an harsat. Chutiang kara hnehna chan theih chu thil lawmawm tak a ni a, ka tan chuan hnehna hlu leh lawmawm bik a tling," tiin a sawi.

Alcaraz hian a match lehpekah chuan Luca Nardi a hmachhawn leh ang - Nardi hian inkhel dangah Jakob Mensik chu 6-2, 2-1 in a hneh. Minute 42 an inkhelh hnuah Czech Republic player Mensik hi hliam vangin a inhnukdawk.

Grand Slam vawi nga champion tawh Alcaraz chuan, "Tunge ka hmachhawn dawn tih ai chuan, engtiangin nge ka khelh chhuah tih kha a pawimawh zawk. Season khat hi a rei em em a, tun season tawp hma pawhin hmabak kan la ngah.

"A thim zawnga thlirtu tan chuan a hahthlak chang a awm, mahse season rei leh hahthlak tak hian lawmna leh hlimna tam tak min siamsak tih erawh kan hriat a ngai ve bawk," a ti, tun season chhungin Monte Carlo leh Rome Masters 1000-ah te a champion tawh a ni.

Inkhel dangah Francisco Comesano pawh a chak - Argentina tlangval leh a khingpui Reilly Opelka te inkhelh laklawh laiin ruah a sur a, minute 45 chhung an chawl lailawk; match point vawi thum a inchhanhim hnuah 6-7 (4/7), 6-4, 7-5 in a chak.

World number 71 Comesano hmachhawn leh tur chu Andrey Rublev a ni ang, inkhel dangah Russian tlangval Rublev hian Alexei Popyrin lakah 6-7 (5/7), 7-6 (7/5), 7-5 in hnehna a lo chang ve bawk a ni.

Alexander Zverev te erawh an inkhel zo hman lo - German tlangval Zverev hian Brandon Nakashima lakah 6-4, 5-4 in hma a hruai a, a service leh tur chiah a ni bawk, mahse ruah sur leh ṭek tla nasa vangin an inkhel chhunzawm thei lo.