Celtics-ah Joe Mazzulla a nghet

Boston Celtics chuan an head coach Joe Mazzulla chu an thlungnghet a, contract thar a ziah chen hi tarlan ni chiah lo mah se kum khat aia rei a ni dawn a, season thum chhung hun a lo hman tawh chu a pawtsei tihna a ni.

Kum 37 mi Mazzulla hian regular season bikah Celtics hi vawi 182 chak puiin ṭum 64 an chak lo, playoff chinah bik chuan match 33 chakin vawi 17 an chak lo thung a, kum 2024 khan NBA title a lo lak pui tawh bawk.

Celtics president Brad Stevens chuan, "Joe nena inremna kan nei thei hi a lawmawm. Celtics tana mi ṭhahnemngai leh theihtawp chhuah mi a ni a, a hna thawh hrang hrang thlirlet hian a lungawi thlak hle.

"Chawhrualin season khatah vawi 60 kan chak tling a, chak tam ringawt loin kan champion bawk. A kaihhruaina hnuaiah hian season ṭha tak kan hman chhunzawm theih ngei pawh ka beisei," tiin a sawi.

Ruahman dan chuan, khawvela basketball inelna ngaihhlut tak hi October tawp aṭangin regular season an khel ṭan ang, match hmasa berah champion lai Oklahoma City Thunder chuan Houston Rockets an hmachhawn ang.