Bournemouth-ah Diakite a lut

Premier League club Bournemouth chuan French centre-back Bafode Diakite an lalut - Lille aṭanga Diakite lei nan hian pound maktaduai 30.3 an hmang, a khelh ṭhat dan a zirin pound maktaduai 4.3 danga san belh leh thei tur a ni bawk.

Kum 24 mi Diakite hian season hmasa khan Lille tan Ligue 1 match 31 khelin pangana a nih pui a, hemi bakah hian Champions League match 10 a khel tling bawk a ni.

Tun nipui bazar chhungin Cherries hian an player ṭha an chan nasa - tun hnai khan Illia Zabarnyi chuan Paris Saint Germain a pan san, a hmunruak luah turin Diakite hi an lalut.

Illia Zabarnyi an hralhna aṭangin Bournemouth hian pound maktaduai 57 an hmu, hemi hma hian Real Madrid chuan Dean Huijsen (£50m) an leisak a, Liverpool Milos pawhin Kerkez (£40m) an lo leisak tawh bawk.

Bournemouth hian an tlarhnung an siamṭhat a ngai dawn tih chu thil chiang a ni. Diakite hma hian left-back Adrien Truffert an lo lalut tawh bawk a, bazar hun a la zawh loh avangin player dang pawh an la melh a rinawm.

Andoni Iraola enkawl Cherries hian Premier League season thar an match hmasa ber atan August 15, Zirtawpni zanlaiah champion lai Liverpool an lenchilh nghal dawn a ni.