Veteran final-ah Ramhlun United Vs Ditea's FC

I Day Veteran Football final chu vawiin tlai 3:00 hian Ramhlun United Veteran leh Ditea's FC ten RG Stadium, Mualpuiah an khel dawn. Final hma zawng hian Chite Playground-ah khelh a ni a, ground lian zawk RG Stadium-a final khelh a nih dawn avangin inkhelh kalhmang pawh a danglam daih ang.

Ditea's FC hian quarterfinal-a Mizoram Ex Service an hneh hnuin semifinal-ah Electric Veng an sawp a, Mizoram sports minister Lalnghinglova Hmar hoa khel team hi champion tura rinkai an ni. Ditea's hian goal khung turin Jerry Zirsanga, KC Lalenghluna leh Lalthanpuia te an kawl a, Mizo striker tlan chak Lalsangbera'n kum 40 a tling chho tawh bawk nen an goal bawh a na dawn.

Ramhlun United Veteran erawhin hming langsar an kawl lo a, mahse final lut turin semifinal-ah team ṭha G90's an hneh tih hriat a ṭha. Vanlalthara Khiangte-in G90's laka goal awmchhun a khung bakah quarterfinal-a Veteran United 2-0 a an hneh ṭumin goal a khung a, ani hi Ramhlun United Veteran chhuanvawr tur a ni. Chutihrualin an player neih dan thlirin Ramhlun United tan nomawi chawi tur chuan goal khung aia goal venhim an ngaih pawimawh a ṭul ang.