Chhinga 'Chanmari' an ṭha tawk

Coach Lalsangzuala Hmarin Chanmari a hriatchian ang thoin Chanmarians lamin Saikhamakawn coach hi an hrechiang. Chanmari captain Lalrinchhana Tochhawng hian Sanga hnuaiah Chanmari FC, Chhinga Veng FC leh Chawnpui FC-ah te MPL nomawi a chawi vek tawh a, ani tluka Sanga hrechiangtu an awm chuang lo.

Chanmari coach Rochhingpuia pawh hi Sanga hrechiangtu tho a ni a, tunah chuan amah enkawltu ni loin a elpui a ni tawh dawn. Chhinga hian player a nih laiin sulhnu nei ṭha mah se coach a nih hnuah erawh sulhnu ṭha chhuan tuar a la nei lo. Chutihrualin Chhinga vanneihna tur erawh Sanga khelh duh dan a hriat chian angin a elpui coach hian coach a nihna anga a khelh duh dan a hrechiang ve lo thung.

Hei chauh hi a ni lo a, Chanmari FC hi I League club an nih bakah an budget a san avangin an duh ang player thlang thei an ni. Coach Chhinga hian a duh ang player zawng zawng chang vek thei lo mah se club thuneitute laksak player-te hi an ṭha hlawm hle. Saikhamakawn chuan Aizawl FC leh Chanmari FC lak bang an la ve chauh tiin a sawi theih zawk.

A tawi zawngin Chanmari hian player an nei ṭha zawk a, an squad a chhah zawk a, sulhnu an nei ṭha zawk a, champion tura rinkai an ni zawk. Chhinga tan zanin hi hun ṭha a ni a, coach anga Chanmari FC a champion pui hmasak ber ṭum a nih avangin thutlukna siam dik a pawimawh ang.