Chanmari hrechiangtu Sanga

Saikhamakawn coach Lalsangzuala Hmar tluka Chanmari FC hrechiang an awm kher lo ang. MPL ṭantirh lama team enkawltu a nih bakah club dang a enkawl hnuah let lehin MPL nomawi a chawi pui. Season liam ta pawh khan Sanga hi a vawi hnih nan Chanmari-ah a kir a, , I League 2 tlinpuiin MPL-ah erawh semifinal-ah Mizoram Police hneh loin an tla. Chanmari FC-in I League 2-ah Sanga ring ngam tawh loin Dipankur Sharma an lalut a, zanin hian a club lakah a theihna lantir a châk dawn.

Season chawlh laiin Central YMA Football buatsaih a ni a, coach Sanga hian Republic Veng enkawlin Chanmari chu second round-ah hmachhawnin an pet thla nghal a, nomawi hial a chawi zui bawk. Mahse, Sanga hian Republic Venga a player pawimawh CYMA Football best player Lalnunzira leh defender ṭha Laltluangliana te lakluh tum mah se Chanmari FC lakah a chan thung.

Sanga leh a puitu Francis Rambeiseia ten Chanmari chauh ni loin MPL an hrechiang a, hei vang hian team enkawltu an ngai pawimawh manager atan Chanmari pa C. Lalthanmawia (Mawitea) an lalut. Mawitea hian hun rei tak Chanmari manager hna a chelh tawh avangin Chanmari bakah MPL a hrechiang viau bawk.