Zaninah La Liga khelh ṭan a ni dawn

Spanish top flight league pawh zaninah khelh ṭan a ni dawn a, club lian erawh an la inlan dawn rih lo - season thar atana match hmasa ber chu zan dar 10:30-ah khelh a ni dawn a, Girona khelmualah Rayo Vallecano an lenglut ang.

Tun hnaia Barcelona nen USA-a La Liga match khelh an tum avanga thawm nei na tak Villarreal chu zanin dar 1:00-ah an inlan dawn bawk a, segunda division aṭanga kai thar Real Oviedo an mikhual ang.

Oviedo hian Santi Cazorla an la nei a, Spanish midfielder vang hian tam takin he inkhel hi an en dawn. Arsenal midfielder hlui hi Arsenal-ah hliam vangin a talbuai a, a season tawp berah phei chuan inkhel miah loin hun a hmang.

Mahse, a hliam nat em avanga a inkhelh theih tawh loh tur thu an hrilh hman Cazorla hi 2018-19 season khan inkhel turin a lo kir leh a, a club hlui, a professional career ṭanna club hian lawm takin an lo pawm.

Villarreal tan hian season hnih a khel leh hman a, match 86-ah goal 22 a khung. Qatar lamah kal zuiin, Al Sadd tan season thum a khel a, kum 2023 khan Oviedo hi a zawm.

Cazorla hi Oviedo aṭanga inzir chhuak niin, a club hlui a zawm hian hlawh nei loa khelh a tum a, mahse, sorkar danah a theih loh avangin hlawh hniamtê nei chungin Spanish second division club tan hian a khel.

Season hman zawh takah khan match 35 khela goal nga khungin, assist vawi nga a nei a, playoff kaltlangin Spanish top flight league khel turin a hruai kai - 2000–01 season hnua La Liga an khelh hmasak ber tur a ni.

Kum 40 mi Cazorla hian a contract hmang zo tawh mah se, Oviedo hian kum khat dang contract an ziahpui leh a, a club hlui tho, amah hmangaihtu Villarreal a tawng leh tur hi en châk an tam ang.