Sinner leh Alcaraz an chak

Cincinnati Open khelh mekah player ṭha pahnih Jannik Sinner leh Carlos Alcaraz te chu hma lam panin an kal mek zel a, quarterfinal an lut ve ve, an chak zel chuan nomawi an inchuh ang.

Nilaini zan P&G Center Court-a inkhelah, seeded pakhatna Sinner hian Adrian Mannarino chu 6-4, 7-6 (7-4) a hnehin a thiam zual pariat zingah a inhlangkai a, a match lehpekah chuan Felix Auger Aliassime a hmachhawn leh dawn a ni.

World number 1 Sinner-a'n game thumnaah a khingpui service chhuhsakin, inkhel a thunun zui nghal a, set hnihna an khelh laiin world number 89 Mannarino-a'n match point hmasa chu aces siam hmangin inchhanhim mah se, a tawpah a ṭang zo ta chuang lo.

Italian tlangval Sinner chuan, "Veikhawr a nih vang pawh a ni mai thei, player ka hmachhawn tawh ho zingah chuan inkhelhpui harsa ka tih tak a ni. Veikhawr pawh ni lo mah se a ball vuakna lai kha a fing ṭhin bawk," tiin a khingpui a fak hle.

Inkhel dangah Carlos Alcaraz tan harsatna a awm lo - Spanish star hian Italian mi Luca Nardi chu 6-1, 6-4 in a hneh a, Grand Slam dawta inelna ngaihhlut Masters 1000-ah a vawi 18 nan quarterfinal a lut tling ta chiah bawk.

Grand Slam vawi nga champion tawh Alcaraz hian match a khelh hnuhnung 38 zinga 36 laiah hnehna a chang thei, a hmabak chu Andrey Rublev a ni ang. Russian star Rublev hian Francisco Comesana chu 6-2, 6-3 in a lo hneh ve thung.

World number 2 Alcaraz chuan, "Tournament kan khelh laia match ka khelh ṭhat ber ṭum a ni ang. Boruak lum leh uap churh mai kara ka khelh chhuah danah khan ka lawm takzet a ni," a ti a, hard court inelna tir lamah khan a insiamrem mai thei lo deuh a ni.

Alexander Zverev pawh a chak - German tlangval Zverev hian Brandon Nakashima chu 6-4, 6-4 in a hneh. Thawhṭanni zana an inkhelh ṭumin, set hnihna an khelh zawh hma hretin ruah leh ṭek tla vangin an chawl a, game khat lek khelh zawm lehin a chak tlang.