Alonso a fimkhur dawn

Real Madrid manager Xabi Alonso chuan fimkhur takin La Liga season tharah bul an ṭan dawn tih a sawi, a ṭul hunah chuan tlarhma lama tlante pawh goal venghim tura an let taimak a ngai dawn hle a ni.

Carlo Ancelotti-a'n hlawhtling takin Real Madrid a enkawl a, a chhuah dawnah erawh duhthusam angin a hun tawp a hmang bik lo. Team enkawl lama la patuai ve tak Alonso tan hna a awlsam dawn bik lo hle.

Bayer Leverkusen tana Bundesliga nomawi la thei Alonso chuan, "Thil a awlsam dawn lo, chuvangin a bul aṭanga kan beih a ngai dawn. A pawimawh hmasaah chuan player tin ten goal venhim an ngaipawimawh tur a ni.

"Khelmual chhunga lut zawng zawngin kan himna an ngaihthah thiang lo, chutiang chiah chuan engtik hunah nge goal kan nawr ang tih an ngaihtuah tel tur a ni a, nawr a hunah chuan tlarhnung lam pawhin a hma lam ami puih hun an hriat a ngai ve bawk," a ti.

Club World Cup an khelh lai khan Kylian Mbappe leh Vinicius Junior ten tlarhnung lam an pui ṭha tawk lo niin an sawi, season thar inbuatsaihna an neih hoah erawh an tlan let tam viau tawh thung.

Season hmasa khan an player thar Mbappe-a'n goal 43 ngawt a khung a, mahse Barcelona an tluk loh avangin La Liga champion an ni lo. Champions League-ah pawh Arsenal an hneh lo - Club World Cup an khelh ṭum pawhin Paris Saint Germain an ngam lo.

Spanish manager Alonso chuan, "Team kan inpumkhat a pawimawh a, mimal tin kan inhriatchian a ngai bawk. Kan inhriatchian vek chuan, hmasawn kan ngaihna lai kan hre thei dawn bawk a ni," tiin a sawi.

Vinicius leh Mbappe te hi an khelh thiamna hmun a inang a, season hmasa kha chuan tlarhma laiah Mbappe hi a dah ṭhin. Season thar an inbuatsaihna match hnuhnungah pawh a laiah dah niin goal hnih a khung, a awm chhunzawm zel a rinawm.

France captain Mbappe hian UCL champion châkin Real Madrid hi a pan, season khatnaah chuan a hlawhtling lo. Coach thar Alonso hoin chona thar an hmachhawn dawn a ni a, an hmuhnawm khawp ang.

Real Madrid hian La Liga season thar an match hmasa ber atan August 19, Thawhlehni zanah Osasuna an mikhual dawn a ni.