Vawi 50 chak tling Sabalenka

Hmeichhe tennis world number 1 Aryna Sabalenka chuan Jessica Bouzas Maneiro hnehin Cincinnati Open quarterfinal a lut a, season kal laiah match 50 laiah hnehna a chang tling ta chiah bawk a ni.

Sabalenka hian nimin zing khan Bouzas Maneiro hi 6-1, 7-5 in a hneh a, kumina hnehna chan tam lamah amah hnaih bertu Iga Swiatek aiin vawi riat ngawtin hnehna a chang tam zawk.

Kum 27 mi Sabalenka hian a match lehpekah chuan Elena Rybakina a hmachhawn ang, inkhel dangah seeded pakuana Rybakina hian Australian Open champion Madison Keys chu 6-7 (3-7), 6-4, 6-2 in a lo hneh ve thung.

Wimbledon champion Swiatek pawh hma lam panin a kal zel. Polish nula hian Sorana Cirstea chu 6-4, 6-3 in a hneh, chak tho mah se tihsual a ngah avangin a tlang awlsam lo, a match dawtah chuan a fimkhur a ngai hle dawn a ni.