LBS Suzuki CYMA Futsal Final: Zanin dar 8:00-ah Zonuam Vs Dinthar

LBS Suzuki 1st Inter Branch YMA Futsal Tournament 2025 final chu zanin dar 8:00 hian Zonuam leh Dinthar ten R. Dengṭhuama Stadium, Mualpuiah an khel dawn. Eng inelnaah pawh Mizoram pum huap inelnaa champion a hlu a, champion hmasa ber nih hi a hlutna belchhahtu tur a ni.

CYMA Futsal final inkhel en man hi Rs 50 chauh a ni a, Central YMA YouTube kaltlangin a en theih bawk ang. Tun ṭuma final-a inkhel turte hi Lalmalsawma Memorial Futsal MFA Inter Village Futsal Tournament 2020 final-ah an inkhel tawh a, Dinthar hian 6-3 in hnehna an chang.

Dinthar thawm a ring

Dinthar hian futsal-ah tawnhriat an nei ṭha a, MFA hnuaia futsal inelna mumal taka kalpui a nih aṭangin club mumal tak an nei nghal. Futsal khel nasa veng an nih avangin an khel a nghet a ṭha a, coach leh player-ten tawnhriat an nei ṭha.

Dinthar coach K. Lalrintluanga (Mapuia) chuan, "Kan senior player-ten min kaihruai ṭha a, team boruak a ṭha a, chak duhna rilru kan phu. Chutihrualin Pathian tel lo chuang engmah kan ni lo," tiin Vanglaini a hrilh a, an pivot (striker) Samuel-a coaching licence nei an ṭangkaipui thu a sawi bawk.

Final lut turin Dinthar hian futsal khel thiam veng vek an hmachhawn a tih theih a, team ṭha an ni tih nemnghehna erawh team ṭha Chanmari leh Ramhlun Vengthar te an sawp thei a, chutihrualin Sihphir Venghlun hneh tur erawhin vanneihna an mamawh thung.

Ramhlun South an hneh ṭuma goal awmchhun khungtu Samuel Laltlanthanga hi kum 2020-a an champion khan Zonuam lakah hattrick a siam a, best player-a thlan a ni. Tun ṭumah a kum upa deuh tawh mah se inkhel boruak sangah a la pawimawh thei ang. Team innghahna erawh Michael K. Lalhriatpuia a ni a, ani hian goal riat a khung tawh a ni.

Zonuam an nghet ṭha

Dintharin MPL club an nei a, tun ṭum futsal inelnaah hian an player ṭha ṭhenkhat an chhawr thei lo. Zonuam erawhin ISL, I League leh MPL-ah player an nei ve lo a, futsal-a insawrbing an nih avangin buaina an nei lo. Hei chauh hi a ni lo a, Zonuam hi CYMA Futsal atan chauha team din ni loin hun rei tak chhung MFA hnuai futsal inelna khel tawh an nih avangin an khel a nghet ṭha hle.

Dinthar final kalkawng harsa viau mah se Zonuam kalkawng hi a la harsa zawk a; champion tura rinkai Electric Veng bakah team ṭha Bawngkawn leh Republic Veng te an hneh avangin final-ah pawh inrintawkna an ngah dawn.

Kum nga liam taa Dinthar an hneh loh ṭum kha chuan Zonuam tan Lalṭhazuala (Puitea) a pawimawh fal a, tunah erawh Puitea thlawp tur hian Peter Lalzuiliana, Lalhruaizela leh K. Lalmalsawma te an rintlak. Player tinin goal-ah an pet thei vek a, khelh dan nghet an nei a, Dinthar ai pawhin an buk a rit zawk.

Nikum November thla khan Zonuam hian MFA buatsaih Inter Veng Futsal Tournament final-ah Durtlang 3-1 a hnehin an champion tawh a, Central YMA Futsal inelnaa an champion leh thei a nih chuan 'double champion' an ni dawn a, Mizorama futsal thiam ber tiin an chhal theih ang.