Veteran Football champion Ditea's FC

Nimin khan I Day Veteran Football final chu RG Stadium-ah khelh a ni a, Ditea's FC chuan Ramhlun United Veteran 3-0 a hnehin an champion. Ditea's FC midfielder Joel Lalthangmawia chu best player a ni a, Jerry Zirsanga'n match tinah goal khung vekin goal 13 khungin top scorer a ni thung. Tun ṭum veteran football inelna hi kum 1985 leh a hmalama piang chin tan a ni a, inelna hi team 21-in an hmachhawn a ni.

Final-ah squad chhah ṭha Ditea's FC-in inkhel an thunun a, first half-ah KC Lalthlenghluna freekick hmangin goal khat chauh khung mah se second half-ah Jerry Zirsanga leh Lalsangbera te hmangin an khung belh a, an phu angin 3-0 in an chak.

Tlai boruak nuam tak hnuaiah inkhel bul an ṭan a, Ramhlun United an ṭang thei viau. Mahse, player theihna nei sang danglamna a lang a, minute 17-naah 30 yard vel aṭangin Thlenga'n mawi zetin freekick aṭangin a khung. Ditea's hian first half-ah goal dang khung theihna nei mah se Ramhlun United keeper Das-a an paltlang thei tawh lo.

Second half-ah ruahsurin inkhel a tibuai a, inkhelh kalhmang a inthlak hlawk. Ground-a tui tling vangin Ramhlun defender a chesual a, a tihsual hrem turin Jerry-a a tlan chak bakah a thiam tel a, minute 45-naah Ditea's goal hnihna a khung. Ditea's Ramhlun tlarhnung tihsual bawk an hmang ṭangkai a, minute 57-naah Thlenga thlaktu Lalsangbera'n a tlan chakna hmangin chance a insiam a, goal kilah tak a pet lut.

Ditea's FC-in inkhel thunun mah se goal an khung belh thei tawh lo a, 3-0 in an chak. Nomawi chawi turin Ditea's FC hian group stage-ah Bethlehem Vengthlang (16-0) leh Tlungvel Veteran (6-2) an hneh a, quarterfinal-ah Ex Servicement FC 2-0 in an hneh a, semifinal-ah Electric Veng 4-0 in an hneh leh bawk. Tun inelnaah Ditea's hian goal hnih chiah chhuahin goal 31 an khung a, inelna a thunun hle.