Newcastle squad-ah Isak a tel lo

Premier League-ah Newcastle United-in vawiin tlai dar 5:00 hian Aston Villa an hmachhawn dawn a, Villa Park tlawh tur zingah Alexander Isak a tel dawn lo.

Swedish striker Isak hian Liverpool zawm a duh avangin team training a la zawm lo a, a chungah hian ngaihven a hlawh. Nimin tlai press conference-ah pawh Isak-a chungchang sawi hmasak ber a ni a, Eddie Howe chuan, "Kan dinhmun a la reng a, thil thar a la awm lo," tiin a sawi a, an inkar ṭhat thu erawh a sawi lang tho.

Nipui bazarah Newcastle an che ṭha tawk lo a; an striker lak tum Benjamin Sesko bakah Dean Huijsen, Bryan Mbeumo leh Liam Delap te lakluh tum mah se a hlawhchham vek. Chutihrualin Magpies hian winger Anthony Elanga (£55m), centre back Malick Thiaw (£30m), goalkeeper Aaron Ramsdale (loan) leh winger Antonito Cordero (free) te lakluh nan £85mtd a hmang pha tho.

Nipui bazara an talbuai deuh avangin Mapgies hi season ṭan turin an la inpeih lo deuhah a ngaih theih a, mahse Isak chhiar tel loin Joe Willock chauh an chhawr thei dawn lo. AC Milan aṭanga an lakluh Malick Thiaw pawhin ni hnih chauh la training mah se squad-ah a awm nghal dawn.

Aston Villa lamah striker Ollie Watkins-a'n pre season a hmang ṭha a, English striker hi en bik hlawh tur a ni. Tlarhnung lamah hrem vangin Emiliano Martinez a khel thei dawn lo a, Marco Bizot-a'n goal veng hna a chelh ang.