Baleba cham ringtu Hurzeler

Manchester United-in Brighton midfielder Carlos Baleba lakluh tumin hma an lak mek a, Seagulls manager Fabian Hurzeler erawhin Baleba hi an chelh theih a ring. Brighton hian zanin dar 7:30 hian Fulham an mikhual dawn a, Baleba hian bul a ṭan dawn.

Nimin tlai press conference-ah Brighton manager Hurzeler chuan, "Kan chelh theih hi ka ring takzet. Mahse, hei erawh ka rinna chauh a ni," tiin Baleba chungchanga an zawhna an chhang.

German manager chuan sawi chhunzawmin, "A lu meh dan a thlak tih loh chu engmah danglamna ka hmu lo. A pumpuia thlir chuan nuam a ti a, a teammate nen training ṭha tak an nei thei a, Brighton nih hi a nuam a ti a, Fulham lakah pawh bul a ṭan ang," tiin a sawi.

Kum 21 mi Baleba hian kum 2023 khan Lille aṭangin €27mtd-in Brighton hi a zawm a, English club hian season hnih khel tawhin Premier League-ah match 61 a inlan tawh. Cameroon international hi Seagulls pawhin an dah sang a, Moises Caicedo man zat €133.4 mtd ang vela hralh theih an inbeisei.

Man United tan Baleba lakluh a har dawn tih a chiang a, Brighton hian Cameroon international hi kum 2026 velah chauh hralh an tum. Chutihrualin United-in Alejandro Garnacho, Antony leh Jadon Sancho te an laklut thei a nih chuan Baleba lakluh theih dan an nei ang.