Mizo hranghlui footballer Muanpuia a thi

Mizo footballer hranghlui J. Lalmuanpuia chu August 14, Ningani zan dar 7:50 khan a thi a, I Day Football-a ṭum thum top scorer ni tawh Mizo striker ṭha mi hi nimin Independence Day khan Kulikawn YMA Hall-ah vui a ni.

Muanpuia hi kum 52 mi a ni a, Kulikawn West-ah an cheng. Kum 1990 khan Chaltlang legend F. Lalṭanpuia’n a theihna hmuin Lunglei aṭangin PWD football team-a khel turin Aizawlah a hruai phei a, PWD bakah Mizoram Police, PHE, Aizawl FC, TBL, Dawrpui Vengthar leh FC Kulikawn tan a khel a ni.

Foreign aṭanga Mizorama team lo kal Royal Nepal Airlines leh Ambassador in Sports ten Mizoram XI an hmachhawn ṭumin Mizoram tan player pawimawh a ni ve ve.

Muanpuia hi striker a ni a, goal khung thei ni ringawt loin inkhelh thiam bik a nih avangin a che vel a hmuhnawm a, ngaisangtu pawh a ngah hle. Nimina a vuinaah hranghlui player kal an ṭhahnem a, Mizoram football tan channa nasa tak a ni.