Bournemouth-in Adli an beisei

Premier League club Bournemouth chuan Bayer Leverkusen aṭanga Amine Adli lakluh tumin German club hi an dawr a, club pahnih hi an inrem thei kher ang em, hriat a ni rih lo.

Kum 25 mi forward hian French club Toulouse aṭanga a professional zinkawng zawh ṭanin, kum 2021 khan Leverkusen hi a pan a, Bundesliga leh DFB-Pokal an champion season-ah khan match 42 khela goal 10 khungin, assist vawi ruk a nei.

DFB-Pokal-ah phei chuan match rukah goal nga khungin top scorer a ni a, season hmasaah erawh hliam vangin a talbuai a, thla thum ngawt inkhel loin hun a hmang - match 28-ah goal hnih chiah a khung a, assist vawi hnih a nei.

Morocco international hian Bournemouth hi zawm a duh nia sawi a ni a, German club hnenah chhuah a duh thu a hrilh tawh. Leverkusen hian a man atan pound maktaduai 26 an beisei thung a, Cherries hian an pek phal chuan a chhuah mai a rinawm.

Bournemouth hian an duh tak tak a nih chuan Adli leina tur pawisa an nei. Player pasarih ngawt an hralh a, £200mtd dawn player hralhna aṭangin an hmu tawh - an hralh zingah hian £54.5mtd man Illia Zabarnyi (Paris Saint-Germain),£50mtd man Dean Huijsen (Real Madrid) leh £40mtd man Milos Kerkez (Liverpool) te an tel a, an bank account chhah lai tak a ni!