Sinner tan nomawi a hnai zel

Jannik Sinner chuan Cincinnati Open nomawi chawi turin kawng dik a zawh mek zel, quarterfinal-ah Felix Auger-Aliassime chu 6-0, 6-2 a sawp chungin semifinal a in vaw kai.

P&G Center Court-a inkhelah, world number 1 Sinner hian a tir aṭanga a tawp thlengin inkhel a thunun. Kum 2022 khan player pahnih hi ṭum hnih an inhmachhawn a, hengah hian Auger-Aliassime a chak ve ve; tunah erawh thawnthu a danglam ta.

Seeded pakhatna Sinner chuan, "Ka khingpui service kha ṭha takin ka lo vaw let thei ṭhin a, keiin ṭha takin ka service thei thung, hard court-ah chuan ball a kal chak avangin service ṭhat hi a pawimawh zual," a ti.

Italian tlangval Sinner hian final lut tur chuan Terence Atmane a hneh leh a ngai dawn, inkhel dangah kum 23 mi Atmane hian Holger Rune chu 6-2, 6-3 in a lo hneh ve thung a, qualifying aṭanga in vaw tling zingah tun hnai kum 10 chhunga Cincinnati Open semifinal lut leh thei hmasa ber a ni hial.