East Bengal-in coach thar an nei

I League club East Bengal chuan an coach Alejandro Menendez-a'n a chhuahsan hnuah coach thar an lakluh thu an puang ve lehnghal a, season hmasaa assistant coach Mario Rivera chuan Kolkata club hi a enkawl ang. 

East Bengal hian Kolkata derby-ah Mohun Bagan an ngam lo a, Thawhlehni khan coach Menendez hian banna a thehlut zui - Spanish coach rual hian a assistant Josep Ferre pawh a bang. 

Kolkata club-in hun rei tak nghah tum loin Rivera lam an hawi nghal a, UEFA Pro License nei coach hian season tawp thleng atan contract a ziak a ni.  Kum 42 mi Rivera hian visa buaipui a ngaih avangin East Bengal hi a zawm nghal thei dawn lo a, zanin dar 7:00-a Chennai City an lenchilh tur leh February 1-a Indian Arrows an mikhual turah chuan assistant coach Marcall Trulls leh Bastab Roy ten team kaihhruai hna an thawk ang.  East Bengal boss ni tur hian Mohun Bagan boss hlui Karim Bencharifa leh Bengaluru FC manager hlui Ashley Westwood te hming pawh lam rik a ni a, mahse Kolkata club hian an kalphung hrechiang sa Rivera lakluh an thlang ta a ni.