Hnehna hlu bik a ni - Arteta

A naute khelh dan zawng zawng chu a duhthusam ang vek a ni bik lo, mahse Arsenal coach Mikel Arteta chuan Manchester United khelmual aṭanga point thum an hlawh chhuak thei chu hnehna hlu bik niin a sawi.

Gunners manager Arteta chuan, "Arsenal ka enkawl hma khan league match bikah Old Trafford-ah hian kum 18 emaw kum 22 chhung emaw vel chu chak ni hmel kan hmu lo, tunah erawh thawnthu a danglam ve ta.

"Tunah chuan EPL ṭan niin Old Trafford-ah hnehna kan chang a, chutiang chung chuan kan la lungawi kim thei lo, hei chu thil duhawm tak a ni tawh zawk. Tun ṭumah hian hnehna hlu tak kan chang a ni," tiin a sawi.

Arteta-a'n boruak a thlak danglam pakhat chu club lian laka an khel ṭha ṭhin ta hi a ni bawk. Liverpool, Chelsea, Man United, Manchester City leh Tottenham te an hmachhawn hnuhnung 21 laiah an tlawm miah lo.

Spanish manager hian Viktor Gyokeres khelh dan a siam remsak dawn nge ni a, an striker thar Gyokeres khelh dan milin team a siksawi dawn tih erawh a la sawi chiang thei bik lo a, a pawimawh hmasa berah chuan hnehna chan a ni.

North London club hian August 23, Inrinni zan dar 10:00 hian Leeds United an mikhual dawn, an inkhelhna tur hi Emirates Stadium a nih tawh bakah kai thar team an ngam ṭhin em avangin beisei an nei sang ang.