Diamond Harbour chakpuitu Sairuatkima
Durand Cup-ah I League kai thar Diamond Harbour-in ISL club Jamshedpur 2-0 in an hneh a, Kolkata club tana goal hnih khungtu chu Dawrpui Vengthar tlangval Sairuatkima a ni. Pathianni zan quarterfinal inkhel dangah East Bengal-in an hmelma Mohun Bagan chu 2-1 in an hneh bawk.
Zanin dar 7:00 hian semifinal hmasa zawk khelh a ni dawn a, Jawaharlal Nehru Stadium, Shillong-ah mualneitu Shillong Lajong leh NorthEast United te an inkhel dawn. August 20, Nilaini zanah Diamond Harbour leh East Bengal ten Salt Lake Stadium-ah semifinal hnuhnung zawk an khel ang. Final hi August 23, Inrinni hian Salt Lake Stadium-a khelh tura ruahman a ni.
Mizo tlangval an langsar
Diamond Harbour-ah Sairuatkima bakah Lalliansanga Renthlei, Paul Ramfangzauva leh Samuel Lalmuanpuia ten bul an ṭan a, bench-ah R. Ramdinthar a awm bawk. Jamshedpur lamah Daniel Lalhlimpuia leh C. Lalhriatpuia te an awm a, anni pahnih hi bench aṭangin an lut ve ve.
JRD Tata Sports Complex-a inkhelah mikhual team-in bul an ṭan ṭha a, Jobby Justin-a throw luh na zet chu Sairuatkima'n a su lut a, Dawrpui Vengthar tlangval hian ball ball su lut tur hian a tlan lut ṭha hle.
Jamshedpur lamin Jayesh Rane hmangin goal khungna remchang nei mah se an khung thei lo a, Kolkata club bawkin an khung nawn. Zembawk North pa Samuel-a freekick pet chu box chhung aṭangin Sairuatkima bawkin rilru fim takin kawh zetin a pet lut. Injury time-ah Jamshedpur-in siphurh sut ṭhenan inngai mah se referee-in hand ball vangin a awm lo a, Kolkata club 2-0 in an chak.
Kolkata Derby-ah Mohun Bagan tan Lalengmawia Ralte pawhin bul a ṭan a, East Bengal lamah Lalchungnunga leh Edmund Lalrindika ten bul ṭanin bench-ah David Lalhlansanga leh Mark Zothanpuia te an awm.
East Bengal tan Diamantakos Dimitrios chu bench-ah ṭhu mah se minute 18-na lekah Hamid Ahadad inhliam vangin a lut a, penalty aṭanga minute 38-naa a khung hnuah minute 52-naah a khung leh a, Salt Lake Stadium-ah thawm a ṭha hle. Mohun Bagan-in Anirudh Thapa hmangin siphurh sut ṭhen mah se goal dang hmuh tur a awm tawh lo a, East Bengal 2-1 in an chak.