Atletico an tlawm nghal - zaninah Real

European league ngaihven hlawh pawl La Liga pawh khelh chhunzawm zel a ni a, Inrinni zana Barcelona an chak nghal laiin, champion beisei thei tlemtê zinga mi Atletico Madrid erawh Pathianni zan khan an tlawm nghal.

Atletico hian khualmualah Espanyol chu lenchilhin, Julian Alvarez chuan mawi zetin goal hmahruai a khung a, mahse, a team tan a tawk zo lo - team nem zawka ngaih Espanyol-in Miguel Rubio leh Pere Milla hmangin an chhanglet a, a tawpah 2-1 in an chak.

Diego Simeone leh a naute an tlawm nghal tih hre chungin, tun season-a a vawi khat nan Real Madrid chu zanin dar 12:30 hian La Liga-ah an inlan ve dawn bawk a, Madrid khaw club hian Osasuna an mikhual ang.

Real hian season hman zawh takah khan Barcelona tluk loin, nomawi chawi an nei miah lo a, kut bengin season an mangṭha - coach thar Xabi Alonso hoin team thar an din mek a, zanin an inkhel tur en a châkawm tawh hle.

Beisei phak lo

Atletico-in season hman zawh takah khan nomawi chawi an nei lo a, hei vang hian an elpui Barca leh Real el phak tumin an insang phek a, nipui transfer-ah khan player thar pasarih ngawt an la lut.

Hei mai a ni lo - Atletico hian player pakua ngawt chu a nghetin an chhuahtir a, pahnih chu loan-in an chhuak bawk. Simeone-a'n Atletico thar din a tum a, mahse, match hmasa berah an tlawm nghal!

Espanyol lakah Simeone hian player thar panga ngawt inkhel bul a ṭantir nghal a, midfielder Alex Baena, Thiago Almada, Johnny Cardoso, centre back David Hancko leh left back Matteo Ruggeri te an ni.

Mahse, Simeone-a player tharten Atletico jersey nen danglamna an thlen thei lo a, goal khung hmasa mah se, goal hnih an chhuah zui - bench aṭanga luhtir Giacomo Raspadori tan pawh bul ṭan zan ni mah se, hriatreng aiin theihnghilh a thlanawm zawk.

Alvarez goal mawi

Atletico hian minute 37-naah freekick an hlawh chhuak a, a pet turin Julian Alvarez a lo pen chhuak - Argentine striker hian goal chung kil sirah mawi zetin a thlawh lut a, 2-1 a ni.

Minute 57-naah Alvarez bawk hian goal khung belhna remchang a nei a, mahse, goal-ah a chantir thei lo - uiawm takin post a pet per a, khung ngat se, Atletico hi an chak tlang thei hial ang.

Mahse, Alvarez-a'n a khung lo miau a, Atletico-in an tuar zui. Minute 73-na a ni a, Miguel Rubio inlarin, Espanyol si phurh sutna goal a khung.

Hetah hian a tawp mai lo. Hun tawp nan minute ruk chauh a awm tawh tihah Pere Milla chuan a khung belh ve leh a, chak ngei tura inngai Atletico an tlawm a, season bul ṭan dan duhawm lo tak a ni.