Chris Wood-a'n a thiam a theihnghilh lo!

Season hman zawh takah Nottingham Forest-in Premier League-ah pasarihna ni chungin season an khar a, hun tam zawk chu Champions League khel thei dinhmunah an ding hman hial.

Forest-in beisei phak bak result an neih nana coach Nuno Espírito Santo hnathawh sawi hmaih theih a ni lo a, chutiang chiah chuan league-a goal 20 tehmeuh khungtu Chris Wood pawh lam hmaih theih a ni lo.

Mahse, tam takin Forest result chu vanneih vangah an ngai a, kum 33 mi Wood pawh a vanneih ṭum season a tawng ve maiah an ngaihsak - mahse, New Zealand international hian a ṭha tawk tih pholangin, tun season-a an match hmasa berah goal a khung nghal.

Forest hian team ṭha pangngai tak Brentford chu Pathianni zan khan an mikhual a, 3-1 in an hneh. Forest hian first half chhungin goal thum hi an khung hman a, Wood hian minute ngana lekah goal hmahruai a khung.

Wood hian a duhtawk mai lo - first half hun pek belhah a khung leh bawk a, a goal khung karah hian Dan Ndoye chuan goal khat a thawh ve bawk. Brentford tan Igor Thiago chuan minute 78-naah penalty hmangin si phurh a sut ṭhen a, a team tan danglamna a thlen phak lo.

Brentford hian an coach Thomas Frank chu Tottenham Hotspur lakah an chân a, set piece coach ṭhin Keith Andrews chu coach thar atan an ruat - a match hmasa berah an tlawm nghal.

Bees hian Liverpool aṭanga an lakluh goalkeeper Caoimhín Kelleher chu inkhel bul ṭantir nghal mah se, goal thum a chhuah a, Liverpool captain hlui Jordan Henderson pawh bench aṭanga lutin, EPL-a kir lehna hmasa berah a duhthusam result erawh a nei thei ta bik lo.

Hetihlai hian Brentford hian Newcastle United pan duha nuar, an striker Yoane Wissa an la chhawr duh rih lo a, an player chhuanvawr Bryan Mbeumo chu Manchester United lakah an chân bawk.