Vasco-in Neymar telna Santos sawp

Pathianni zan khan Brazilian Serie A inkhelah Vasco da Gama chuan 6-0 ngawtin Santos an sawp a, Brazilian club lar Santos tana captain armband hrengtu Neymar chuan mittui nen khelmual a chhuahsan hial.

Vasco da Gama tan hian Liverpool midfielder hlui Philippe Coutinho chuan goal hnih a khung a, Lucas Piton, David, Rayan Rocha (penalty) leh Tchê Tchê ten goal khat ṭheuh an khung bawk a, Neymar-a tan a career-a a tlawm chian ber ṭum niin, Serie A-a Santos-in mahni khelmuala goal ruk an chhuah hmasak ber a ni bawk.

Neymar chuan, "Ka zak ngawih ngawih a, kan khelh danah ka lawm lo hle. Fan-te an lungawi lo a nih chuan ka hrethiam em em a ni," a ti a, "Hetiang hi ka la tawng ngai lo a, ka mittui tla kha ka thinrim vang a ni," a ti bawk - engkimah a inrawlh theih bik loh thu a sawi zui.

Brazilian forward Neymar hian January khan a chawr chhuahna Santos hi Saudi club Al Hilal aṭangin a zawm a, June thla khan thla ruk dang atan a contract hi a pawtsei - match 21 khelhsak tawhin, goal ruk a khung a, assist vawi thum a nei.

Pathianni zana an mualpho hnu lawk hian Santos chuan an coach, April-a an lakluh Cleber Xavier chu an ban nghal a, relegation zone aṭangin point hnih chauhin an him.