PSG chakna Vitinha

Paris Saint-Germain chuan Ligue 1 season bul an ṭan a, an match hmasa berah Vitinha-a goal khat hmangin an mikhualna ramah Nantes chu 1-0 in an hneh a, point thum nen season an khuhhawng a ni.

Super Cup champion hlim an ni a, coach Luis Enrique leh a nauten hahchawlhna hun an nei tam lo. Mahse, goal chhuah loin hnehna an chang thei tho a, an league nomawi kawl lai humhim ngei an tum ang.

Paris club tan hian goalkeeper thar Lucas Chevalier chuan goal a veng, season hmasa Champions League an champion theih nana pawimawh tak Gianluigi Donnarumma tan hmun a awm lo - Italy international hi a kalna tur lam a chiang lo mek.

Ousmane Dembele, Khvicha Kvaratskhelia leh Achraf Hakimi te pawh bench aṭanga luh tir an ni a, an ṭhat dan berin an la khel rih lo. Kar tawpa Angers an mikhual hunah erawh an ṭhat danin an inrem tawh a rinawm.

Paris Saint-Germain coach Enrique chuan, "A pawimawh ber chu point thum hmuh kha a ni. Nantes khan an goal an veng thiam em em a, khatiang inkhelah kha chuan goal khung tam a harsa.

"Season rei tak kan hmang a, chumi hnuah chawlhna hun kan nei tam lo. Hmabak hautak tak tak kan neih chhoh leh dawn avangin taksa leh rilru kan tihharh thar a pawimawh ang," tiin a sawi.