Leeds an chak nghal

Premier League kai thar Leeds United chuan Thawhṭanni khan tun season-a an league match hmasa ber an khel a, an mikhual Everton chu 1-0 in an hneh.

Elland Road-a inkhelah team pahnih hi an inhnehtawk mai dawn niin a lang hman a, hun rei tak chu 0-0 a ni. Mahse, hun tawp nan minute ruk chiah a awm tawh tihah Everton captain James Tarkowski chu a handball a, referee-in penalty spot a kawk.

Leeds tan player thar Lukas Nmecha a lo pen chhuak a, Germany forward hian harsatna nei loin goal-ah a chantir - Premier League-a a match hmasa berah goal a khung a, Leeds a chakpui nghal.

Tarkowski hian handball-ah a inngai lo a, Laws of the game-ah chuan, "Player-in a kuta ball a tawh fuh a, a taksa, a nih dan phung ang aia a lang lian a nih chuan handball tur a ni," a inti.

A hrilhfiah dan awlsam berah chuan, taksaah kut a beh thlap hian handball lo a ni thei a, Tarkowski hian a kut chu a dah bet thlapah a ngai - mahse, referee hmuh dan a dang a, penalty a chawitir.

Tarkowski chuan, "Referee khan a thutlukna a sut dawn emaw ka ti. 'Ka taksaah ka kut a bet a, penalty a ni lo ang tiraw?' ka ti a, 'Ni lo' tiin min chhang," a ti a, referee thutlukna a hriatthiam loh thu a sawi.

Everton manager David Moyes chuan, "Referee thutluknaah ka lawm lo hle. Tarkowski khan a kut a tante a nih ngawt loh chuan khawiah nge a dah chuan ang?" a ti a, a lawm lo hle.

Hetihlai hian Manchester City aṭanga loan-a Everton zawmtu Jack Grealish pawhin Everton tana a match hmasa ber a khel a, bench aṭanga a luh hnuah penalty hi an chawi thung!