Spurs-ah Romero a nghet

Tottenham Hotspur captain Cristian Romero chuan club tana a rinzawmzia a lantir a, Argentina international defender hian North London club-ah season li dang cham belh turin contract a ziak.

Kum 27 mi Romero hian 2021 August khan Atalanta aṭangin Tottenham hi a zawm, a tirah chuan loan hmangin a zawm. Season hmasa khan Manchester United hneha Europa League an champion theih nan pawh khan a thawh hlawk hle.

Nipui bazarah Atletico Madrid chuan an ngaihven a, Spanish club hian lak ngei tumin hma pawh an la. Mahse, manager thar Thomas Frank enkawlna hnuaiah hmasawn theih a beisei, captain dinhmun chelhin an match hmasa berah pawh an khel ṭha hle.

Romero chuan, "Ka tan chuan Spurs hi khawvela club ṭha ber a ni. Hnehna chan duh mi kan ni a, hlawhtlinna chan chakin kan tuihal em em bawk, ka tan chuan contract ziah thar theih hi thil lawmawm a ni," tiin a sawi.

Hmanni lawk khan Spurs coach Frank chuan Romero a dahsanzia a lo sawi tawh a, player dangte tana entawn tlak a nih bakah a khelh puite ngei pawhin an zah thu a sawi, a lakah beiseina a neih san rualin a mawhphurhna pawh a sang nghal dawn hle.