Galatasaray sawiseltu Morata

Alvaro Morata chu Galatasaray chungah a lawm lo, club tan theihtawp tak meuh chhuahin hun hmang mah se chhuak lo thei lo dinhmunah an dintir niin a sawi.

Kum 32 mi Morata hian loan hmanhin Turkish club hi a zawm a, duh ni se la chuan pound maktaduai 8.6 in an lei thei bawk. Mahse, kar hmasa khan an inremna an titawp a, club dang a zawn a ngaih phah ta zawk.

Cesc Fabregas-a enkawl Como zawmtu Morata chuan, "Inzah tawnna neih a pawimawh a, miin theihtawp chuaha an beihna chu kan zahsak tur pawh a ni," tiin Galatasaray lakah a lungawi lo hle.

Morata hian nikum khan Atletico Madrid aṭangin Milan hi a zawm a, season li chhung atan contract a ziak. Mahse, Milan hian kumin February khan Galatasaray-ah loan hmangin an kaltir a, an inremna hi kum 2026 January thlang atan tih a ni.

Amaherawhchu, Galatasaray pawhin an kawl rei ta lo, an inremna a zawh hmain an nawr chhuak leh ta zawk a, tunah chuan Chelsea tana a lo khelh pui thawh Fabregas enkawlna hnuaiah chona thar a hmachhawn ang.