MPL12 phase 2 aṭangin zanah khelh a ni dawn

MFA finance secretary LV Lalthantluanga (Tatoa) chuan MPL12 phase 2 aṭangin zanah inelna neih a nih tur thu a sawi. Phase 1-ah hian match hmasa zawk hi chhun dar 12:00-ah khelh a ni a, match hnuhnung zawk hi tlai dar 3:00-ah khelh a ni. Phase 2 aṭang chuan match hmasa zawk tlai dar 3:00-ah khelh a ni ang a, match hnuhnung zawk zan dar 7:00-ah khelh a ni ang.

Tatoa chuan, "Second Phase aṭang hian zana khelh kan tum dawn," tiin Kick Off-naah a sawi a, kal khawmte hi player leh coaching staff-te an nih avangin thawm pawh a ṭha nghal hle. MPL club-ten zana inkhelh an châk tih a chiang hle.

MFA finance secretary chuan sawi chhunzawmin, "Zana inkhelh hi MFA hruaitute hian kan duh reng a, mahse harsatna tam tak a awm. Kuminah chuan zana kan khelh theih nan diesel kan lo thawh ang e, tia mi phal tak takten min lo pui dawn.

"Mizoram sports minister leh MFA president ni bawk Lalnghinglova Hmarin a rawn thawh belh bawk ang," tiin a sawi a, diesel rawn tum turte hi puanzar a la rem rih loh thu a sawi lang bawk a ni.