Silcharah G90's-in Veteran Football khel dawn

Kum 1990 chhoa Mizo footballer-te intelkhawmin an din G90's chuan January 25-27, 2020 a khelh tur 2nd Veteran International Football Tournament khel turin nimin khan Silchar an pan.

Inelnaah hian team riat G90's (Mizoram), Bangladesh, Nepal, Delhi, Tripura, Kolkata, Duliajan leh Silchar te an tel. G90's chairman HF Lalrinpuia chuan, "G90's thupui chu 'Nang malsawmna ni ang che' tih a ni a, inelna kan hmachhawn piah lamah hian kan inpui tawn a, ṭanpui ngaite kan ṭanpui ṭhin," tiin Vanglaini a hrilh

G90's hian kum 2017 leh 2018 khan Champhai leh Lungleiah Charity Match an khel a, nikum khan Kolasib-ah Charity Match vawi hnih an khel leh bawk.