PFA Awards: Salah a thiam ber

English football-a award ngaihhlut hlawh ber, Professional Footballers' Association Awards chu Thawhlehni zan khan semchhuah a ni a, chawimawina ngaihhlut hlawh ber, PFA men's player of the year award chu Mohamed Salah hnenah hlan a ni.

Liverpool forward Salah tan he chawimawina a dawn vawi thumna a ni a, heti zat dawng thei dang an la awm lo - Salah ropuina nemnghehin a awm nawn a, 'Egyptian King' hming lem an pek hian English football-ah ro a rel zel.

Premier League-a Liverpool champion puitu Salah tan season liam ta kha season duhawm bik ang hiala chhal theih a ni a, tuna award a dawn hma hian Premier League player of the season leh Football Writers' Association (FWA) footballer of the year chawimawina a lo dawng tawh.

Mang neia!

Hmanah Josefa'n mang a nei a, a unauten awih loin, "Mang neia" tiin ko mah se, a mumang thlen dik takzia hretute in ni - chu Josefa ropuina ram Aigupta aṭang chuan tlangval pakhat, a hming Salah a lo chhuak a, ani pawh mang neitu a ni!

Salah chuan, "Footballer nih ka duh fo ṭhin a, mi lar tak nih a, ka chhungte nuamsa taka dah kha ka tum ber a ni ṭhin. Hetihrual hian Egypt aṭang chuan duhthusam ropui tak neih a harsa hle.

"Mahse, mahni tawka hma kan sawn chuan, thil thlir dan a danglam tial tial a, awmzei nei takin hmachhawp kan nei a, kan beiseina pawh a sang lehzual ṭhin a ni," a ti a, a lo beisei ṭhin ramah a awm mek thu a sawi.

Record siamtu

Salah hian 2017–18 leh 2021–22 season-ah khan he award hi a lo dawng tawh a, mahse, a dawn hmasak season hnihah hian league nomawi a chawi lo ve ve thung - season liam taah erawh EPL champion an ni.

Kum 33 mi forward chuan, "Nomawi kan chawi tel avangin he award hi a hlu lehzual hle. Champion hi a pawimawh ber chu a ni a, tun season-ah pawh nomawi humhim tumin kan bei ang. He award ka dawn theih nana min vote tu player-te chungah lawmthu ka sawi a ni," a ti.

Salah hian Liverpool tana a khelhpui Alexis Mac Allister, Manchester United captain Bruno Fernandes, Newcastle United striker Alexander Isak, Chelsea forward Cole Palmer leh Arsenal midfielder Declan Rice te khumin, he award hi a dawng a ni.

Egyptian King

Salah hian season hman zawh takah khan Liverpool tan league match 38 khelin goal 29 ngawt a khung a, assist vawi 18 a nei tel - EPL top scorer a ni a, English top flight league-a top scorer a nih vawi lina a ni.

Egyptian King hming lem an pek hian inelna hrang hrangah match 52 ngawt khelin goal 34 a khung a, assist vawi 23 a nei tel. Reds tan season riat khel tawhin, season khata goal 20 khung tlin loh a la nei lo!

Tun season hi Liverpool-a season kua a hmanna tur chiah niin, league match khat an khelh tawhah goal a khung leh der tawh a - EPL ṭanna inkhelah goal 10 ngawt khung tawhin, hetiang tithei player dang an la awm lo.