Chawimawi tlak Sir Gareth Southgate

England manager hlui, UK sorkarin football-a a hnathawh ṭhat avanga 'Sir' nihna hial a pek, Sir Gareth Southgate chu a hnathawh ṭhat avangin PFA merit award hlan a ni.

Kum 1974 aṭang khan PFA merit award hi sem ṭan a ni a, Southgate hi England manager lo ni tawh zinga he award dawng thei pangana a ni - Three Lions tan nomawi chawi chiah lo mah se, a hnathawh ṭhat avangin chawimawiin a awm zel.

Southgate hian kum 2016 - 2024 chhung kha England hi enkawlin, kum riat a kaihruai a, major tournament paliah Three Lions hi kaihruaiin, Euro 2020 leh 2024-ah final a luhpui a, World Cup 2018-ah semifinal an lut bawk.

Kum 54 mi coach hian England a enkawl hma khan, England Under-23 chu kum thum zet a lo kaihruai hman a, senior team atan player a lo chher hriam nual hman.

England enkawl zuiin, match 102 ngawt a kaihruai a, England coach ni tawh zinga match 100 enkawl tling thei pathum zingah a tel - match 64-ah ngawt hnehna a chanpui.

Southgate hian England a enkawl chhung khan player 42 ngawt chu ram tana an match hmasa ber a khelhtir a, England manager lo ni tawh zingah heti zat player-te ram tana match hmasa ber khelhtir an la awm ngai lo.