US Open khelh ngei tum Sinner

Damlohna vanga enkawl lai Jannik Sinner chuan US Open khelh ngei a tum tih a sawi a, singles match khelh tum mah se mixed doubles an khelh tur aṭang erawh chuan a inhnukdawk thung.

Cincinnati Open khelh zawh takah Sinner leh Carlos Alcaraz ten final an khel a, set khat pawh an khelh zawh a nih hmain damlohna vangin a inhnukdawk a, tunah chuan a dinhmun ngai awh leh tumin enkawl mek a ni.

Italian tlangval Sinner chuan, "Grand Slam hi ka ngaina a, tournament tam tak awm zingah ka ngai pawimawh ṭhin hle bawk. Kan hma lawka khelh tur US Open hi a harsa dawn tih chu ka hria, mahse inlan theih ngei ka duh.

"Tournament lian khel turin ka rilru leh taksa a inpeih a ngai, tunah hian ngaiawh leh thei turin hun ka la nei. Tuna ka thil tum lian hmasa ber chu US Open khelh a ni, chumi hma chuan inpeih hman ngei pawh ka inring," a ti.

Mixed doubles huangah erawh Sinner hi a inhnukdawk a, a ṭanpui tura tih Katerina Siniakova kiangah a khel thei dawn lo. Hard court inelnaah hian Sinner-a elpui Alcaraz erawh Emma Raducanu nen mixed doubles-ah hian an inlan ang.

Mipa tennis thuneitu sang - Association of Tennis Professionals (ATP) chuan US Open khelh huna hman tlang tawh turin world ranking an ti chhuak a, a chung berah Sinner hi awm chhunzawmin a dawtah Alcaraz a awm bawk.

US Open champion Sinner aia Alcaraz hniam zawkna hi point 1890 chauh a ni a, season hmasa khan Spanish star hi second round-ah a tla, point hum tur 50 chauh a nei tihna a ni a, kuminah a khel ṭha a nih chuan number 1 nih theihna remchang a nei ang.

Spanish star Alcaraz hian number 1 dinhmun a lo luah reng tawh ṭhin a, tun ṭumah hian a lehthal leh thei a nih chuan kum 2023 September hnua a chung bera a lawn lehna hmasa ber a ni thei dawn a ni.