Aizawl FC lakah Police an mualpho nawn

GIG Motors MPL12-ah champion lai Aizawl FC-in nomawi humhim ngei an tum tih lantirin nimin khan MPL11 final-a an hmachhawn Mizoram Police chu 5-0 in an sawp. I League club hian I Day Football-ah Police hi 5-0 in an hneh tawh bawk a, Aizawl FC lakah an mualpho nawn.

Aizawl FC tan Zomuanpuia'n hattrick siam a, Eric Remruatpuia Chhangte leh substitute Lalhruaitluanga ten goal khat ve ve an khung bawk. MPL11 champion R. Lalruatfela hoten champion zia an chhuah a, MPL10 champion Police erawh an khelh dan thlirin relegate a hlauhawm thung.

AFC an chungnung

Police-in kumin bul ṭantu zingah kumin recruitment-a an lak thar pakhatmah an tel lo a, Aizawl FC lamin damlohna vangin striker C. Lalhriatpuia an chhawr thei lo thung. Farkawn tlangval Hriata aiah Zomuana'n bul a ṭan.

I League club-in inkhel an thunun a, Zomuana siamsak chu Vincent Lalduhawma'n keeper F. Lalmuanawma chiah hmachhawn hnuah a khung lo. Midfielder talent nei ṭha Lalawmpuia Sailo (OmOma) pawhin box pawn aṭangin crossbar a pet per a, hnai tak aṭangin Eric-a'n a pet over a, midfielder thawkrim Isak Lalvenhima'n pawhin a hun ṭha neih goal zawnah a pet thei lo.

Police lam tan R. Malsawmtluanga freekick ṭha zet chu keeper Vanlalhriatpuia'n a dang a, Kawnpui tlangval hian Lalbiakhlua goal khung tur pawh a dansak bawk. Minute 38-naah AFC-in freekick pet thutin OmOm-a'n ṭha zetin through ball a pe a, Vincent-a'n thui tak a tlanpui hnuah mahni hmasial loin Zomuana tan a pe a, AFC forward hian goal hmahruai a khung.

Goal li dang

Second half-ah Police an insiamṭha hret a, freekick aṭangin F. Lalrinpuia'n a tauh lut teuh hle. Mahse, Police tlarhnung a pawp a, tlarhnungah defender intlar ṭhup mah se minute 64-naah Serchhip tlangval Eric-a'n a tlawh lut.

Aizawl FC-in set piece an zir ṭha tih a lang a, corner kick aṭangin Zomuana'n minute 71-naah a tauh lut a, minute ruk hnuah hattrick a siam zui. Minute 77-naah Sawma Tlangte-in vei lam aṭangin ṭha zetin a lalut a, a cross ball chu Zomuana'n goal-ah chantirin MPL12 a hattrick siam hmasa ber a ni.

Aizawl FC-in player naupang zawk bench aṭangin an rawn luhtir a, Fela Hlawndo-in crossbar a pet per bakah goal pawnah chiah a pet. Police tan Valpuia'n box chhungah chance ṭha a nei a, kawh zetin goal ban a pet per. I League club-in substitute Lalhruaitluanga'n injury time-ah a khung a, AFC no. 9 Hruaia hi reserve aṭanga senior team-a sawn chhoh niin Mizo striker hmabak nei eng ber zinga mi a ni.

R. Lalruatfela enkawl Aizawl FC 5-0 a chakin MPL12-ah bul an ṭan a, an khelh danah an lung a awi ang. Police erawh MPL10 champion an nih bakah MPL11-ah final thleng mah se MPL12-ah erawh an insiamṭhat loh chuan tlak a hlauhawm thei ang.