Naupang League Season 4 khelh ṭan a ni leh dawn ta

RFYC Naupang League Season 4 chu vawiin aṭangin RG Stadium, Mualpuiah ṭan ni dawn a, team 12 inelna ni ṭhin chu team 16-ah tihpun a ni. Inrinni leh school chawlh apiangin RG Stadium-ah football festival a awm leh dawn tihna a ni a, inelna kalphung an thlak hret bawk avangin inelna a nung sawt ang.

Inelna hi Reliance Foundation Youth Champs leh Mizoram Football Association buatsaih ni a, team tin hian Under 8, Under 10, Under 12 leh Under 14 team an nei vek. Tun ṭumah hian league round-a zo ringawt tawh loin League Stage leh Cup Stage-ah ṭhen a ni tawh ang.

League Stage-ah hian team tin hi vawi hnih ṭheuh an inkhel chhuak ang a, team tinin match 30 ṭheuh an khel dawn. Heta ti ṭha pariatte hian Naupang Cup an khel ang a, a hniam pariatten Emerging Cup an khel thung ang. Cup Stage hi group stage, semifinal leh final-ah ṭhen hran a ni ang.

Team khatah hian player 60 an awm a, chawhrualin naupang 960 an tel. Reliance chuan player-te hi jersey, mawza, shinguard, bag leh tui bottle a pe vek a, inkhelh ni leh training ni apiangin ei tur a pe ṭhin a; coaching staff-te pawhin T Shirt an dawng vek bawk.

RYFC technical head Lalrindika chuan, "Reliance hian season khatna aṭangin chik takin kan league hi a endik a, kan kalpui danah pawh an lawm a, chutihrualin hmasawn zel an duh.

"Season linaah phei hi chuan technical head pawhin team pressing pek dan, attacking dan leh thil dang dang kan lo endik ve dawn a, chumi a zir chuan training pawha hrana pek leh tur a ni. Team-te bakah nu leh pa te nen thawhhona a ṭha ṭhin a, kuminah pawh thawhhona ṭha tak kan nei leh kan beisei," tiin Vanglaini a hrilh.

Naupang League hi Aizawl bakah Champhai, Kolasib leh Lungleiah te khelh a ni a, vawiin hian Champhaiah inelna hi ṭan a ni ve bawk dawn. Kolasib leh Lunglei te hian karleh August 30, Inrinni hian inelna hi an ṭan ang.