Man United tan kawl a êng dawn em?

Manchester United chuan Premier League match hmasa berah Arsenal 1-0 in an hneh lo a; August 24, Pathianni zan dar 9:00 hian Craven Cottage-ah Fulham an tlawh dawn. Ruben Amorim-a'n nipui laiin player lakluh nan pound maktaduai 200 chuang a seng a, London club lakah point thum hlawhchhuah a tum dawn.

Portuguese manager-in buaina chinfel tur a nei a, Gunners lakah Andre Onana chu squad-a dah loin Altay Bayindir a luhtir a, Turkish keeper hian an chak lohna chhanah mawh a phur. Nipui bazara goalkeeper a la lut dawn lo a nih chuan goalkeeper nghet a neih ran a ṭul ang.

Tlarhnungah Amad Diallo-a'n pre season bul a ṭan ṭha a, EPL-ah erawh Diogo Dalot-a'n bul a ṭan zawk. Portuguese defender hi a defending a ṭha zawk a, chutihrualin Fulham hi Arsenal aia an nem dawn avangin Amad pawhin bul a ṭan thei ang.

Man United hian hliam vangin tlarhnungah Lisandro Martinez leh Noussair Mazraoui te an la chhawr thei dawn lo a, chutihrualin dam ṭha sa Harry Maguire tan pawh khelh phak a har dawn. Gunners lakah Leny Yoro, Matthijs de Ligt leh Luke Shaw te an khel ṭha a, Patrick Dorgu pawhin thahrui a nghah hle.

Nipui bazara lakluh Matheus Cunha leh Bryan Mbeumo te an che ṭha a, Gunners tlarhnung tan buaina tham an tling. Benamjin Sesko-a'n Fulham lakah bul a ṭan thei a, mah se RB Leizpig aṭanga United zawmtu hi a inlan dawn a nih chuan Mason Mount a awl a ngai ang. Mount hian bul a ṭan ṭhat avangin Amorim-a tan thutlukna siam a har ngei ang.

Joshua Zirkzee a dam ṭha tawh a, mamawh dan a zira chhawr theih a ni dawn. Amorim-a hoten point an la hmu lo a, tunah hian season liam taa an awmna 15-naah tho an la awm. Season tir aṭanga a chanve chunglama awm turin point thum hlawhchhuah a pawimawh dawn a, Fulham hian an match hmasa berah Brighton hmachhawnin Amex Stadium-ah injury time-a Rodirgo Muniz hmangin point khat an hlawh chhuak.