History siam tumtu Mizo telna Diamond Harbour

I League club thar Diamond Harbour chuan Durand Cup an khelh vawi khatnaah champion nomawi chawi nghal an tum a, vawiin tlai dar 5:30 hian Salt Lake Stadium-ah champion lai NE United nen final an khel dawn. Inkhel hi Sony Ten 2 leh SonyLiv hmangin a en theih ang.

Diamond Harbour hi kum 2020-a din chauh kha a ni a, coach atan I League-a Mohun Bagan champion pui tawhtu Kibu Vicuna la lutin, Spanish manager ho hian I League 3 leh I League 2-ah champion I League khel turin an inpettling. Kum 53 mi Vicuna hi I League, I League 2 leh I League 3 a champion vek thei hmasa ber a ni a, tunah Asia rama inelna upa ber Durand Cup-ah champion a tum leh dawn.

India ram football buaina vangin Durand Cup-in hlut a hlawh a, Mohun Bagan leh East Bengal pawhin team ṭha an khelhtir vek. Vicuna hote hian group stage-ah Mohun Bagan hneh lo mah se Kolkata club ṭha dang Mohammedan hnehin knockout stage an lut tho. Quarterfinal-ah ISL club Jamshedpur chu an mualah 2-0 in an hneh a, semifinal-ah East Bengal 2-1 a hnehin mumang ramah an cheng mek.

Diamond Harbour tan Mizo tlangvalten hmun pawimawh an chang a, Jamshedpur an hneh ṭuma goal hnih hi Dawrpui Vengthar tlangval Sairuatkima khung ve ve a ni. East Bengal an hneh ṭumin Zemabawk North midfielder Samuel Lalmuanpuia a hmuhnawm a, Kolasib midfielder Paul Ramfangzauva leh Lunglei midfielder Lalliansanga Renthlei te an ṭangkai viau bawk. Kolkata club hi an squad a chhah ṭha a, R. Ramdinthara (Tharpuia) bench-ah awmin squad chang pha lo zingah Mizo player an la awm bawk.

Salt Lake Stadium-a khelh tur a nih avangin Diamond Harbour beiseina a sang dawn a, chutihrualin ISL club leh champion lai NE United buk a rit zawk. NE United hian Aizawl FC aṭangin Lalrinzuala leh Lalbiakdika te an la lut a, Juan Pedro Benali hnuaiah Rinzuala'n bul a ṭan pha.

NE United hian season liam taa an player pawimawh Alaaeddine Ajaraie an la kawl a, player an neih hrawl bawk vangin Salt Lake Stadium-ah nomawi humhim ngei an tum dawn. Nikum khan NE United hian final-ah Mohun Bagan an hneh thei a, chutihrualin kumina an hmachhawn tur pawh Kolkata club tho an nih avangin khawtual club hneh hi a awlsam lo ang.