Hliam vanga chawl tur Frimpong

Liverpool-in chanchin lawmawm lo hriat tur an nei a, Trent Alexander-Arnold thlak nana lakluh, right back Jeremie Frimpong chu a malpui hliam vangin a chawlh a ngai a, September international break thleng chu a chawl rih ang.

Kum 24 mi Frimpong hi tun season EPL match hmasa bera Bournemouth an hnehna inkhelah bul a ṭan a, mahse, lakchhuah a ngai. A hliam hi chiang zawka enfiah a nih hnuah, September thlatir thleng chu a chawlh a ngai dawn tih hmuhchhuah a ni.

Frimpong hian Thawhṭanni zana Newcastle United an hmachhawn hunah Reds jersey a ha thei rih dawn lo tihna a ni a, Anfield-a Arsenal an mikhualna inkhelah a inlan thei lo bawk ang - game pawimawh pahniha inlan theih loh hi Reds tan chânna a tling.

Liverpool head coach Arne Slot chuan, "Frimpong ka lakchhuah avang khan sawisel ka ni a, mahse, a khelh dan avanga la chhuak ka ni lo. A malpui lamah harsatna a nei niin kan hria a, medical staff lam thurawn angin kan la chhuak ta a ni," a ti a, Cherries laka Frimpong khelh tluan loh chhan a sawifiah.

Slot chuan, "International break zawhah a lo kir leh theih kan beisei," a ti a, international break hi September 1-9 inkar hian neih a ni dawn a, September 14 zana Burnley an lenchilh hunah chuan a lo kir leh theih tawh a beiseiawm tihna a ni.

Frimpong a inhliam takah chuan right back-a khel turah Slot tan luhaina tham a awm. Reds hian Conor Bradley nei mah se, Northern Ireland international hi hliam aṭanga lo kir hlim hlawl a ni a, a chhawr nghal theih ang em, hriat a ni lo.

Slot chuan, "Frimpong hi player inhliam khat tak a ni a, Bradley hi season hmasa khan vawi hnih emaw vawi thum a inhliam ve mai thei. Hetiang hi chu thil thleng ve thei a ni.

"A pawi ber chu position khata hliam pahnih kan nei hi a ni a, chutihrual chuan an position-a khel thei player dang kan nei. Wataru Endo pawh a khel thei a, Dominik Szoboszlai pawhin harsatna a nei lo ang," a ti.

Joe Gomez chu right back-a chhawr theih dang ni mah se, ani pawh hliam dam hlim chauh a ni a, Cherries lakah khan minute 20 a khel. Slot chuan, "Gomez hian right back-ah a khel thei a, mahse, minute 20 pawh kha a tan chuan a rei hret.

"Training chu a nei pangngai tawh a, Magpies laka bul ṭan turin a inpeih em, tih chu kan la en ang. Position pakhata hliam pahnih neih chu a buaithlak a ni," a ti.