Serie A-ah De Bruyne hoin Napoli

Zanin aṭangin Serie A season thar an ṭan dawn - champion lai Napoli chuan dar 10:00-ah Sassuolo an lenchilh dawn a, an player ṭha Kevin de Bruyne hoin a bul an ṭan thei ang.

Season hmasa khan Antonio Conte hoin Italian champion an ni a, kuminah pawh mi ngaihven an ni leh dawn - striker ṭha Romelu Lukaku erawh hliam vangin a inlan ve thei dawn rih lo thung.

Naples club tana chona hmachhawn tur De Bruyne chuan, "Inelna hautak khelh a, chona thar hmachhawn ka la duh vangin Napoli hi ka zawm a, inelna chu a lo hautak hle tih pawh a takin ka hmu.

"England rama football kan khelh dan nen kha chuan a kalphung a danglam a, thiamna leh theihna a danglam em em bawk, insiamrem tumin theihtawp ka chhuah ve reng bawk a ni," tiin a sawi.

Kum 34 mi De Bruyne hian City tana hlawhtlinna hrang hrang a chan hnuah a chhuahsan a, a vanglai pel ve ṭan mah se theihna sang tak a la nei. Serie A bakah Champions League an khel dawn a, rintlak a nih la rinawm.