Vini-a'n contract thar ziak duh lo

Real Madrid forward Vinicius Junior chuan contract thar a la ziak duh lo a, Brazil international hi Spanish club tan a khelh chhunzawm zel ang em, tih chu zawhna awm mek a ni ta.

Vini hian Real-ah hian kum 2027 thleng khel turin contract a nei mek a, a contract neih lai ang chuan season khatah euro maktaduai 17 a hlawh mek - hetah hian bonus leh thil dang a tel vek bawk.

January khan Real hian Vini hi contract thar an zawrh tawh a, he inbiaknaah hian club aiawh mi pawimawh bakah Vini aiawhtu agent pahnih leh a pa an tel a, Real dawrna an pawm lo.

Real hian Vini hi season khata €20mtd hlawhtir an inhuam nia sawi a ni a, hei hi chhiah pek tur leh cut ngai ang chi cut vek hnuah a ni. Mahse, Vini-te lam hian Real dawrna hi an pawm duh lo a, Spanish club hian Brazilian forward aiawhte hi an duh zat sawi turin an ti.

Vini-te lam hian kum khatah €30mtd hlawh an duh thu Real hnenah an thlen a, tah hian bonus, contract thar ziah man tihte chu a tel vek nia sawi a ni.

Real-a player hlawh sang ber Kylian Mbappe chuan kum khatah €30mtd hi a hlawh nia sawi a ni a, Vini hian French striker hlawh zat hi hlawh ve a duh.

Mahse, Real lam hian heti zat hlawh pek hi an tum lo a, tunah chuan Vini lam aiawh hian inbiakna an titawp rih niin an sawi - star player ngah Real hian buaina an tawk chho zel dawn niin a lang.

Spanish media ṭhenkhat chuan, Real thuneitu zingah Vini chu Saudi Arabia lama kaltir mai pawi ti lo an awm ṭan tawh niin an ziak hial a, hlawh uchuak tak pek ai chuan sum tuak nan an it zawk a ni mai thei!

Real Madrid hian tun season-a an league match hmasa berah Osasuna chu 1-0 in an hneh a, he inkhelah hian Vinicius pawhin bul a ṭan. Pathianni zan dar 1:00-ah match hnihna khel turin Real Oviedo an lenchilh ang.